Պնդաճակատը...

Թեկուզ քո բոլոր
Կայանքներով ցրես
Ամպերս՝
Գլխիդ հավաքված,
Մեկ է կգամ թաքուն
Գիշերվա մթի մեջ
Ու առտուն շաղ կգամ
Այգուդ վրա...

Ու հենց դռնից դուրս գաս
Բակ-այգիդ ավլելու
Մերկ ոտքերիդ կընկնեմ
Շոգից կվերանա՜մ...

28.06.2011

Ուզում եմ....

Ես ուզում եմ որ դու
Մեկ-մեկ նաիվ լինես
Ու չարաշահես
Համբերությունս...

Հետո ամպես ներսից,
Երբ որոտս լսես,
Փլվես ամպի նման
Ու արտասվես...

Ու անձրևով լցված
Տունս մտնես,
Հոգիս խուժես
Մաքուր օդի նման...

Իմ թաց ու ցողաբույր
Առավոտը լինես՝
Տանս թարմության
Առհավատչյան....

Բարի լո՜ւյս...

Առավոտը բացվեց,
Երկնից լույսը ծորաց,
Ընկավ քրտնած բարձիդ
Ու աչքերիդ վրա...

Լույսին կարոտս տամ,
Թող լույսի հետ գա,
Վերից ծորա, մնա
Մազերիդ վրա...

Առավոտվա լույսից
Թող օրհնանքս հունցվի
Բարի լույսով մաղվի
Բախտիդ վրա...

Բախտ որոնողին...

Ի՞նչ ես փնտրում, գնա՜,
Բախտը ինչի՞դ է պետք
Ինչո՞ւ ես զուր տեղը
Ժամանակդ վատնում:
Բախտդ արդեն տվել է
Քեզ մի անգին նվեր...

Ձեռքեր՝
Քո ապագան
Ի՛նքդ կառուցելու....

***

Երբ ես անցյալ դառնամ,
Չվշտանա՜ս...
Չէ՞ որ,
Մի օր վառվող ապագադ եմ եղել…
Եվ ներկադ եմ եղել այն անցողիկ,
Որ աչքերիդ ժպիտն իր մեջ առել,
Պահել է` փոխանցի դարերին,
Որ ասի, թե մի օր անցյալում
Մի… չեղած ապագա է եղել…